Fyrsta ferð sumarsins; Borgarfjörður – Dalir – Snæfellsnes 1. -2. júní n.k.

Félagið efnir til 2ja daga ferðar á þetta svæði. Skráning á feb@feb.is / síma 5882111

Lagt af stað úr Stangarhyl klukkan 9 um morguninn og ekið sem leið liggur upp í Borgarnes, þar sem höfð verður stutt viðdvöl og við skoðum okkur aðeins um á staðnum. Þaðan verður haldið upp í Norðurárdal  og komið við í Bifröst og kíkt á fossinn Glanna í Norðurá. Þar í hrauninu tökum við upp nestið okkar áður en við höldum um Bröttubrekku og vestur í Dali. Komum við í Búðardal og ökum um Skógarströnd áleiðis til Stykkishólms. Þar verður gist á Hótel Stykkishólmi  og borðaður kvöldmatur. Skoðum okkur um í Stykkishólmi við komuna þangað eða eftir morgunverð daginn eftir. Daginn eftir liggur leiðin  út á Snæfellsnes þar sem komið verður við á nokkrum stöðum. Hádegishressing á Hellnum eða Arnarstapa. Á leiðinni til Reykjavíkur höfum við viðdvöl á sunnanverðu Snæfellsnesi  eftir veðri og vindum. Áætlaður komutími til Reykjavíkur um klukkan 18.
Innifalið í verði er akstur í rútunni, gisting, kvöldmatur og morgunmatur í Stykkishólmi og hádegishressing á laugardeginum. Fararstjóri og leiðsögumaður Kári Jónasson. Verð kr 39.500. Skráning í þessa og allar aðrar ferðir félagsins á feb@feb.is / sími 5882111