Fréttir af starfi félagsins

Dansleikur felldur niður

Dansleikurinn sem vera átti sunnudaginn 9. ágúst fellur niður vegna hertra COVID reglna.
Vonandi birtir til næstu daga, þannig að hægt verði að halda áfram að dansa þar sem frá var horfið.
06/08/2020|

FEB ferðum frestað

Vegna hertra COVID reglna þurfum við því miður að fresta  ferðunum um Fjallabaksleið nyrðri, Landmannalaugar og Vík sem fara átti þann 6. ágúst og  um Sprengisand í Fjörður, Flateyjardal og Tröllaskaga sem fara átti dagana 9.-12. ágúst.

Ef ástandið batnar á næstunni stefnum við á að fara þessar ferðir seinna í ágúst.  Við munum vera í sambandi beint við alla þá sem skráðir eru í ferðirnar, þegar málin skýrast betur.

Hlýjar kveðjur til ykkar allra

05/08/2020|

Spennandi FEB ferðir – Nú fer hver að verða síðastur að bóka

Nú styttist óðum í eftirfarandi ferðir:

Fjallabaksleið nyrðri, Landmannalaugar og Vík, þann 6. ágúst. – FRESTAÐ
Enn á ný efnir FEB til dagsferðar um Fjallabaksleið nyrðri. Um er að ræða ferð með viðkomu í Þjóðveldisbæinn í Þjórsárdal, ekið inn í Landamannalaugar og farið um Jökuldali og Eldgjá í Hólaskjóli svo eitthvað sé nefnt. Síðan verður ekið niður Skaftártungur og til Hótel Dyrhólaey, þar sem kvöldmatur ,sem er innifalinn í verði, bíður ferðalanga áður en haldið verður til Reykjavíkur.
Brottför frá Stangarhyl 4, klukkan 8:30 þann 6. ágúst.
Verð kr. 18.500 fyrir félagsmenn en 19.500 fyrir utanfélagsmenn.

Leiðsögumaður: Kári Jónasson

 

Ferð um Sprengisand í Fjörður, Flateyjardal og Tröllaskaga. 9.-12. ágúst – FRESTAÐ
Þessi ferð fyllist alltaf fljótt!
Fjögra daga viðburðarík ferð þar sem gist verður þrjár nætur á  Hótel Eddu, Akureyri.  Brottför er kl. 8:00 frá Stangarhyl 4, þann 9. ágúst og er ekið í rútu allan tímann, nema farið á fjallabílum yfir í Fjörður. Fyrsta daginn er ekið um Sprengisand til Akureyrar. Á öðrum degi er ekið norður Flateyjardalsheiði allt út á Flateyjardal. Á þriðja degi er haldið út í Fjörður um Leirdalsheiði á vel útbúnum fjallabílum. Á fjórða og síðasta degi er ekið aftur til Reykjavíkur en um Eyjafjörð að vestan, gegnum Dalvík og Ólafsfjörð, stoppað verður á Siglufirði. Ekið suður á ný um Þverárfjall og þjóðveg 1.
Verð kr. 90.000 í tvíbýli og kr. 95.000 í einbýli (5.000 kr. álag fyrir utanfélagsmenn)

Leiðsögumaður: Gísli Jónatansson

 

Hvetjum ykkur til koma með.

Tekið er á móti bókunum í síma 5882111 eða með því að senda okkur póst á feb@feb.is, eða heilsa upp á okkur á skrifstofu FEB að Stangarhyl 4.

Hlökkum til að heyra frá ykkur – Það fyllist fljótt

 

03/07/2020|

Nú duga ekki lengur orðin tóm

Eftirfarandi tvær ályktanir voru samþykktar á aðalfundi FEB árið 2020

Aðalfundarályktun 1:

Nú duga ekki lengur orðin tóm
Aðalfundur FEB 2020 lýsir yfr miklum vonbrigðum með það hversu lítið hefur gengið að leiðrétta launakjör eftirlaunafólks, þrátt fyrir hástemmdar yfrlýsingar stjórnmálamanna fyrir síðustu alþingiskosningar. Lífeyrir frá almannatryggingum hefur ekki fylgt launaþróun síðustu ára eins og lög um almannatryggingar kveða á um. Á tímabilinu 2010-2019 hækkuðu lágmarkslaun um 92%, en á sama tíma hækkaði grunnupphæð ellilífeyris frá TR einungis um 61,6%. Skerðing á lífeyri frá almannatryggingum vegna annarra tekna er meiri en þekkist í þeim löndum sem við berum okkur saman við. Tekjur eftirlaunafólks eru að stærstum hluta frá lífeyrissjóðum og almannatryggingum og því skiptir samspil þessa tveggja kerfa öllu fyrir kjör þeirra. En hin mikla skerðing almannatrygginga, sem byrjar strax og greiðslur frá lífeyrissjóðnum ná 25 þús. kr. á mánuði, setur meirihluta eftirlaunafólks í þá stöðu að ávextirnir af áratuga lífeyrissparnaði hrökkva skammt til framfærslu. Í ofanálag vinnur þetta kerf markvisst gegn því að fólkið geti bætt kjör sín af eigin rammleik með öfun viðbótartekna. Þegar skerðing almannatrygginga leggst við tekjuskattinn og útsvarið verður niðurstaðan grimmir jaðarskattar, sem leggjast á eftirlaunafólk og öryrkja og valda því að þau öldruðu halda í besta falli eftir 27 til 35 krónum af hverjum 100 krónum sem þau hafa í aðrar tekjur. Engum öðrum þjóðfélagshópum er ætlað að búa við slíka skattheimtu, enda er hún óboðleg og óásættanleg.
Aðalfundur FEB 2020 skorar á stjórnvöld að taka strax afgerandi skref til að leiðrétta kjör eftirlaunafólks. Hækka verður lífeyri a.m.k. til jafns við lágmarkslaun og líta sérstaklega til þess hóps aldraðra sem er verst settur. Jafnframt verður að hefja vinnu við uppstokkun á regluverki lífeyristrygginga, sem komið er í ógöngur vegna óhófegra tekjutenginga og hárra jaðarskatta.

Aðalfundarályktun 2:

Málsókn gegn ríkinu eina úrræðið
Aðalfundur FEB 2020 lýsir yfr fullum stuðningi við málsókn Gráa hersins gegn stjórnvöldum og hvetur eftirlaunafólk að fylkja sér á bak við hana. Tilgangur málsóknarinnar er að fá úr því skorið hvort skerðing almannatrygginga standist stjórnarskrá og mannréttindasáttmála. Eftirlaunafólk hefur ekki yfr að ráða neinum þvingunarúrræðum til að knýja á úrlausn mála sinna gagnvart stjórnvöldum. Málsókn gegn ríkinu er því aðferð sem eftirlaunafólk neyðist nú til að grípa til, þar sem ekki virðast vera líkur á að aðrar og hefðbundnari aðferðir muni bera árangur.
Fundurinn fagnar mjög þeirri ákvörðun stjórnar VR að gerast fjárhagslegur bakhjarl Málsóknarsjóðs Gráa hersins, og tryggja með því að mögulegt verður að reka málið fyrir öllum dómsstigum þar til lokaniðurstaða fæst.

21/06/2020|

Ingibjörg H. Sverrisdóttir nýr formaður FEB

Ingibjörg H. Sverrisdóttir var kosin nýr formaður félags eldri borgara í Reykjavík og nágrenni  í dag 16. júni. Þrír voru í framboði til formanns og eru úrslitin eftirfarandi:

  • Ingibjörg H. Sverrisdóttir hlaut 262 atkvæði
  • Haukur Arnþórsson hlaut 131 atkvæði
  • Borgþór Kjærnested hlaut 29 atkvæði
  • Ógildir 1 atkvæði

Samtals kusu 423 í formannskjörinu.
Við óskum Ingibjörgu innilega til hamingju.

Á fundinum var einnig kosið í stjórn og varastjórn, samtals sjö menn

Til tveggja ára í aðalstjórn voru kjörnir:

  • Kári Jónasson með 313 atkvæði
  • Sigurbjörg Gísladóttir með 300 atkvæði
  • Viðar Eggertsson með 299 atkvæði
  • Ingibjörg Óskarsdóttir var kosin í aðalstjórn til eins árs með 295 atkvæðum

Þrír voru kosnir í varastjórn til eins árs en þeir eru:

  • Finnur Birgisson með 223 atkvæði
  • Haukur Arnþórsson með 184 atkvæði
  • Sverrir Örn Kaaber með 173 atkvæði

Er þeim öllum óskað velfarnaðar í starfi.

16/06/2020|

Dagskrá aðalfundar

Aðalfundur FEB árið 2020
Áður frestaður aðalfundur Félags eldri borgara í Reykjavík og nágrenni sem vera átti þann 12. mars, verður haldinn þriðjudaginn 16. júní kl. 14:00 í Súlnasal í Radisson BLU Saga Hotel.

 Dagskrá fundarins verður samkvæmt lögum félagsins:

  1. Kosning fundarstjóra og fundarritara.
  2. Lögð fram skýrsla stjórnar um starfsemi félagsins á liðnu ári. Gerð grein fyrir úttekt Deloitte vegna byggingar Árskóga 1-3.
  3. Lagðir fram ársreikningar félagsins ásamt fjárhagsáætlun rekstrarársins.
  4. Kl.15.00 kosning formanns.
  5. Umræður um skýrslu stjórnar, ársreikning og fjárhagsáætlun.
  6. Lagabreytingar.
  7. Kl. 15.50 kosning aðal- og varamanna í stjórn og skoðunarmanna ársreikninga.
  8. Afgreiðsla tillagna og erinda sem lögð hafa verið fyrir fundinn.
  9. Ákvörðun um árgjald félagsmanna árið 2020.
  10. Afgreiðsla tillögu stjórnar um árgjald til Landssambands eldri borgara.
  11. Önnur mál.

Félagsmenn eru hvattir til að hafa með sér félagsskírteini.

Stjórn FEB – Félags eldri borgara í Reykjavík og nágrenni

11/06/2020|

Hefur þú áhuga á að vera fulltrúi FEB á landsfundi LEB?

Ágæti félagsmaður

Þann 30. júní n.k. mun Landssamband eldri borgara (LEB) halda landsfund. Félag eldri borgara í Reykjavík og nágrenni (FEB) hefur rétt á að senda 43 fulltrúa á þennan landsfund og að auki þurfa að vera til taks varamenn. Landsfundurinn verður haldinn í Súlnasal Hótel Sögu við Hagatorg og mun væntanlega standa frá kl. 10.00 – 18.00.

Áhugasamir félagsmenn FEB eru hvattir til þátttöku. Vinsamlegast vertu í sambandi við skrifstofu FEB, með því að hringja í síma 5882111, senda tölvupóst á feb@feb.is eða mæta á skrifstofuna, ef þú hefur áhuga. Eingöngu fulltrúar félaganna með gilt kjörbréf útgefnum af stjórnum sinna félaga, hafa rétt á setu á landsfundi LEB.

Við hlökkum til að heyra frá þér.

11/06/2020|

Á slóðir Agnesar og Friðriks – enn nokkur sæti laus.

Viljum vekja athygli á að enn eru nokkur sæti laus í ferðina okkar núna á sunnudaginn 14. júní þar sem við erum að fara á „Á slóðir Agnesar og Friðriks í Húnaþingi“. 
Um er að ræða tveggja daga ferð með gistingu eina nótt á Laugarbakka þar sem við verðum m.a. leidd í allan  sannleikann um síðustu aftökuna á Íslandi, þeirra Agnesar og Friðriks.
Leiðsögumaður er Kári Jónasson.

 

Einnig viljum við minna á ferðina okkar til Vestmannaeyja þann 20. júní – nokkur sæti laus
Dagsferð til Vestmannaeyja. M.a. farið út á Stórhöfa, í Herjólfsdal og í Eldheima
Leiðsögumenn Kári Jónasson og Gerður G. Sigurðardóttir.

10/06/2020|

Aðalfundur FEB árið 2020

Áður frestaður aðalfundur Félags eldri borgara í Reykjavík og nágrenni sem vera átti þann 12. mars, verður haldinn þriðjudaginn 16. júní kl. 14:00 í Súlnasal í Radisson BLU Saga Hotel.
Félagsmenn eru hvattir til að hafa með sér félagsskírteini.

Stjórn FEB – Félags eldri borgara í Reykjavík og nágrenni

08/06/2020|

Dansleikir – gleðifréttir

Okkar geisivinsælu dansleikir hefjast aftur að nýju n.k. sunnudag 7. júní kl. 20:00 í Ásgarði, Stangarhyl 4. Svo áfram alla sunnudaga á sama tíma, með smá sumarfríi seinna í sumar.
Er ekki við hæfi að byrja aftur á sjálfan sjómannadaginn?

Mætum öll og dustum rykið af dansskónum.

02/06/2020|

FEB vorferðir í Reykjavík

Einu sinni í viku fram í júní, bjóðum við uppá áhugaverðar skoðunarferðir á höfuðborgarsvæðinu með leiðsögn. Ferðirnar eru félagsmönnum að kostnaðarlausu fyrir utan fargjald með ferju út í Viðey og ef til vill aðgangseyrir að safni/söfnum.
Því miður verður ekki hægt að mæta óskráður í ferðirnar þar sem við verðum að virða fjöldatakmarkanir sem eru nú 20 manns. Tekið er á móti skráningu í síma 588 2111
Vinsamlegast athugið að fyrsta ferðin er núna á fimmtudaginn 14. maí

14. maí   Laugarnesið
19. maí   Gengið um Kvosina
28. maí   Elliðaárdalur
 4. júní    Staðarskoðun í Viðey
11. júní    Hólavallagarður

Nánari upplýsingar eru á Facebook síðu félagsins

Hlökkum til að sjá ykkur

12/05/2020|

Fréttir af Göngu-Hrólfum

Alla miðvikudaga kl. 10 frá september til maí, hittist hópur af vösku göngufólki hér hjá okkur í Stangarhyl 4 og leggur í klukkutíma göngu. Hlé þurfti að gera á þessu síðustu vikur vegna COVID-19 ástandsins. Nú er hins vegar farið að birta til og næsta ganga verður héðan frá Stangarhylnum miðvikudaginn 13. maí. Göngu-Hrólfar er  opinn öllum félagsmönnum og við hvetjum fólk til að mæta því þetta eru hressandi göngur og frábær félagsskapur – sem jafnframt hlýðir Víði.

Á sumrin eru líka göngur en þær eru farnar frá ólíkum stöðum á höfuðborgarsvæðinu. Dagskrá sumarsins er eftirfarandi:

Göngu – Hrólfar
Gönguferðir á miðvikudögum klukkan 10:00, áætlun fyrir júní, júlí og ágúst 2020

Lagt af stað frá:               

03.06.  Olís Rauðavatni – (Kaffistaður: Olís)

10.06.  Álafosskvos – (Kaffistaður: Bakaríið Mosfellsbæ)

17.06.  Maríuhellar Heiðmörk sunnan til – (Kaffistaður: Golfskálinn Oddur)

24.06.  Reynisvatn/heiði – (Kaffistaður: Golfskálinn Grafarholti)

01.07.  Víkingsheimilinu við Traðarland – (Kaffistaður: Bakaríið Austurveri)

08.07.  Korpúlfsstaðir – Mosfellsbær – (Kaffistaður: Bakaríið Mosfellsbæ

Strætó til baka leið 7

15.07.  Heimörk við Olís Rauðavatn – (Kaffistaður: Olís)

22.07.  Mógilsá Kollafirði – (Kaffistaður: Bakaríið Mosfellsbæ)

29.07.  Kaldársel Valahnúkar – (Kaffistaður: Golfskálinn Oddur)

05.08.  Hafravatn – (Kaffistaður: Golfskálinn Grafarholti)

12.08.  Grafarvogur Olís Gufunes – (Kaffistaður: Olís)

19.08.  Nauthóll Öskjuhlíð – (Kaffistaður: Bakaríið Austurveri)

26.08.  Seltjarnarnes við Bakkatjörn – (Kaffistaður: Golfskálinn Nes)

Upplýsingar veita Holger í síma 843 5327 og Marteinn í síma 846 2154

Verum virk og tökum þátt 

 

07/05/2020|

Leiðbeiningar frá Landlækni sem taka gildi 4. maí

Athygli er vakin á nýjustu leiðbeiningum frá Landlækni vegna viðkvæmra hópa sem taka gildi 4. maí.
Sjá nánar á slóðinni: https://www.landlaeknir.is/…/Leiðbeiningar_velferðarþjónust…

30/04/2020|

Mál Gráa hersins gegn íslenska ríkinu þingfest í Héraðsdómi Reykjavíkur 

27.04.2020

Þrír félagar úr Gráa hernum, baráttuhópi eldra fólks um lífeyrismál, hafa að beiðni og fyrir hönd samtakanna  höfðað mál á hendur Tryggingastofnun f.h. íslenska ríkisins vegna skerðinga stofnunarinnar á ellilífeyri og heimilisuppbót á móti greiðslum frá lífeyrissjóðum. Málshöfðunin er reist á því sjónarmiði að með skerðingu opinberra lífeyrisgreiðslna  í hlutfalli við réttindi, sem ellilífeyristakar hafa áunnið sér í lífeyrissjóðum með vinnuframlagi sínu og iðgjöldum, sé gengið gegn stjórnarskrárvörðum eignarrétti lífeyristaka.

Þessar skerðingar nemi allt að 56,9% af greiðslum úr lífeyrissjóði. Þegar einnig sé tekið tillit til tekjuskatta sé því um að ræða ígildi eignaupptöku á allt að 72,9% greiðslna frá lífeyrissjóðunum. Þetta sé brot á 72. gr. stjórnarskrárinnar og 1. gr. 1. viðauka mannréttindasáttmála Evrópu um friðhelgi eignarréttarins, og ákvæðum 65. gr. stjórnarskrárinnar og 14. gr. mannréttindasáttmálans, sem leggja bann við mismunun.

Í stefnunni er það rakið að kerfi skyldulífeyrissparnaðar, sem komið var á fót með kjarasamningum á árinu 1969, hafi verið ætlað að koma til viðbótar en ekki í stað almannatrygginga. Með núverandi skerðingum sé verulegur hluti þess ávinnings sem rekja má til lífeyrissjóðakerfisins hins vegar færður frá sjóðfélögum til ríkisins. Í stað þess að sjóðfélagar fái sjálfir notið lífeyrissparnaðar síns séu réttindi þeirra í lífeyrissjóðunum notuð til að draga úr útgjöldum ríkisins til almannatrygginga.

Bent er á að gerðar séu ríkar kröfur um að inngrip í eignarréttindi uppfylli þau skilyrði um lögmæti, réttmæti og meðalhóf sem leiða af 72. gr. stjórnarskrárinnar. Íslenska ríkinu sé hinsvegar engin knýjandi nauðsyn á að skera niður útgjöld sín til lífeyris aldraðra með svo stórfelldum hætti, þar sem þau samsvari nú aðeins broti af því sem varið er til þessa málaflokks í nálægum löndum.

Hagsmunir einstaklinganna af því að fá að njóta ávaxtanna af lífeyrissparnaði sínum séu því mun ríkari en hagsmunir ríkissjóðs af því að skerða þessi réttindi. Þá bitni skerðingarnar á fámennum hópi ellífeyristaka auk þess sem lífeyristökum sé mismunað innbyrðis með ýmsum hætti.

Tryggingastofnun hefur verið birt stefna sem þingfest verður fyrir dómi 28. apríl nk. Gera má ráð fyrir því að rekstur málsins geti tekið um 2-3 ár.

Að baki málshöfðuninni stendur Málsóknarsjóður Gráa hersins sem sérstaklega hefur verið komið á fót til að fjármagna málareksturinn. MAGNA lögmenn munu flytja mál einstaklinganna þriggja fyrir dómi.
Sjá nánar á www.graiherinn.is

28/04/2020|

Ný og glæsileg afsláttarbók

Nú er afsláttarbókin 2020 komin út og er aðgengileg hér ofar á síðunni undir „Afsláttarbók“. Afsláttarbókin er einnig farin í póst eða er í dreifingu til þeirra félagsmanna sem greitt hafa félagsgjöldin 2020. Við erum afar þakklát þeim fyrirtækjum sem veita afslátt og hvetjum félagsmenn til að nýta sér þessi góðu kjör.

17/04/2020|

Starfslok Kristínar Lilju hjá FEB

Í dag var síðasti dagurinn hennar Kristínar Lilju hjá FEB. Nú ætlar hún að snúa sér að nýjum spennandi tækifærum sem “heldri manna ” árin hafa upp á að bjóða.

Við þökkum henni fyrir frábær störf á liðnum árum, hún hefur verið einstaklega farsæll starfsmaður og vel liðin. En nú er hún frjáls eins og fuglinn – en þarf reyndar að hlýða Víði um nokkurt skeið. Við óskum þér Kristín Lilja og fjölskyldu þinni velfarnaðar og gæfu um ókomna framtíð. Megir þú njóta komandi frelsis sem mest þú mátt

Stjórn og starfsmenn FEB

08/04/2020|

Hlökkum til sumarsins. FEB ferðir – þessar einu sönnu

Ferðir á vegum Félags eldri borgara sumarið 2020 – (Sjá nánari lýsingar undir „Ferðalög“ hér að ofan)

Söguferð: Dalir – Snæfellsnes, á áætlun 19. og 26. maí
Um er að ræða dagsferðir á söguslóðir Laxdælu í tengslum við Íslendingasagnanámskeiðið.
Fararstjórar Baldur Hafstað og Magnús Sædal.
Á slóðir Agnesar og Friðriks í Húnaþingi. 14.-15.júní
Tveggja daga ferð með gistingu eina nótt á Gauksmýri þar sem við verðum m.a. leidd í allan  sannleikann um síðustu aftökuna á Íslandi, þeirra Agnesar og Friðriks.
Leiðsögumaður er Kári Jónasson.
Vestmannaeyjar 20. júní
Dagsferð til Vestmannaeyja. M.a. farið út á Stórhöfa, í Herjólfsdal og í Eldheima
Leiðsögumenn Kári Jónasson og Gerður G. Sigurðardóttir.
Fjallabaksleið nyrðri, Landmannalaugar og Vík. dags. 6. ágúst.
Dagsferð með viðkomu í Þjóðveldisbæinn í Þjórsárdal, í Landamannalaugum, og farið um Jökuldali og Eldgjá í Hólaskjóli svo eitthvað sé nefnt.
Leiðsögumaður Kári Jónasson
Ferð um Sprengisand í Fjörðu, Flateyjardal og Tröllaskaga. 9.-12. ágúst
Fjögra daga ferð. Ekið um Sprengisand til Akureyrar, farið út á Flateyjardal, út í Fjörður um Leirdalsheiði og heim aftur um þjóðveg 1.
Leiðsögumaður Gísli Jónatansson
Suðurströnd og austur í Öræfi. 28. – 29. ágúst.
Tveggja daga ferð með gistingu eina nótt á Smyrlabjörgum. M.a. komið við hjá Skógarfossi þaðan í Vík yfir Mýrdalssand og í Öræfi. Farið að Fjallsárlóni og Jökulsárlóni og margt fleira.
Leiðsögumaður Kári Jónasson
Suðurland, Njáluslóðir 3. september
Dagsferð þar sem Guðni Ágústsson leiðir okkur á slóðir Hallgerðar Langbrókar og Njálsbrennu
Fararstjóri Guðni Ágústsson

Athugið : Félagið áskilur sér rétt til að fella niður einstakar ferðir vegna ónógrar þátttöku eða af öðrum ástæðum.

Sjá nánar undir ferðalög hér að ofan
Bókanir á feb@feb.is eða í síma 588 2111

18/03/2020|

Góðar fréttir frá Velferðarsviði Reykjavíkurborgar

Kæri félagsmaður

Okkur var að berast eftirfarandi auglýsing frá Velferðarsviði Reykjavíkurborgar:

Eldri borgarar í Reykjavík athugið.  Hægt er að sækja um að fá fulleldaðan heimsendan mat hjá velferðarsviði. Máltíðirnar eru keyrðar heim að dyrum.  Sótt er um í síma 411 9450 eða á netfanginu; maturinnheim@reykjavik.is. Umsóknir þurfa að berast kl. 14:00 daginn áður.

Við fögnum þessu vel og sendum ykkur alúðarkveðjur

18/03/2020|

Upplýsingar um COVID-19 á Íslandi

Góð ráð og traustar upplýsingar á vef Landlæknis má nálgast hér: COVID.is

 

13/03/2020|

Hlýjar kveðjur og frestun viðburða hjá FEB

Kæri félagsmaður

Við sendum þér hlýjar kveðjur og vonum að þú hafir það sem allra best og farir vel með þig.  Okkur þykir leitt að tilkynna að ákveðið hefur verið að fresta öllum samkomum á vegum FEB um óákveðin tíma. Þetta er gert í ljósi þess að heilbrigðisráðherra hefur ákveðið að virkja heimildir sóttvarnalaga til að takmarka samkomur tímabundið í fjórar vikur frá og með næsta mánudegi til að hægja á útbreiðslu COVID-19. Þar er reyndar átt við viðburði þar sem fleiri en hundrað manns koma saman og ná takmarkanir  til landsins alls. En þar sem eldri borgarar og fólk með undirliggjandi sjúkdóma er sérstakur hópur sem þarf að huga vel að, höfum við tekið þessa ákvörðun.

En sólin rís alltaf upp að nýju og saman komumst við í gegnum þetta. Skrifstofa FEB verður að sjálfsögðu opin áfram og við erum hér til að þjónusta þig í gegnum síma og með öðrum rafrænum hætti t.d. í gegnum heimasíðu félagsins www.feb.is, Facebook og með tölvupósti

Viljum líka minna á að með hækkandi sól eru margt spennandi framundan t.d. margar mjög áhugaverðar ferðir innanlands.  Þar er helst að nefna:

  • Söguferðir í tengslum við Íslendingasagna námskeiðin, í lok maí
  • Ferð á slóðir Agnesar og Friðriks í Húnaþing um miðjan júní
  • Dagsferð til Vestmannaeyja þann 20. júní
  • Fjallabaksleið nyrðri, Landmannalaugar og Vík í byrjun ágúst

Og margar aðrar spennandi ferðir sem við munum upplýsa nánar um mjög fljótlega.

Með von um að þú hafir það sem allra best

F.h. FEB

Dýrleif, Jóhanna og Kristín

13/03/2020|